Si presentat Metropolitània de Pepe Corongiu in Nùgoro su 11 de santugaini. Isteddu noale de sa literadura in limba sarda [de Jubanne Piga]

La raccolta di racconti in lingua sarda “Metropolitània e àteros contos tòpicos, distòpicos e utòpicos” di Giuseppe Corongiu sarà presentata a Nuoro venerdì 11 ottobre prossimo alle ore 17.30 nella libreria Mieleamaro, Corso Garibaldi 60. In programma, dopo l’introduzione di Giovanna Casagrande, la relazione di Salvatore Serra. L’autore dialogherà poi con Ciriaco Offeddu. Letture a cura di Mariantonietta Piga e Gianfranca Selis. Nell’occasione, il poeta e scrittore nuorese Giovanni Piga, autore del romanzo in LSC “Sa vida cuada” (Papiros, 2016) ci ha inviato questa nota che pubblichiamo. (NdR)

Sa literadura in limba sarda est creschende in dignidade, caminande a passos mannos ogros a unu cunsideru prus dignu, mèritu finas a oje negau. A bellu a bellu est brinchende sa làcana de is contos de foghile, chi fiant e galu sunt sa madrighe de su contare in sardu. Is iscritores de oe, a su mancu unos cantos, sunt ponende alas nobas a sa sa fantasia insoro, faghende bolare sa mente in s’ampraria de s’infiniu, pintende istòrias de fantascièntzia, mai immaginadas in antis. Is àghidos de su Cosmo los at abertos oje Metropolitània, custu libru balente de Pepe Corongiu.

Dòighi contos, modernos in sa trama, in sa forma  e in s’istrutura narrativa, sena però traigher sas raighinas de sa nadia. Un’òpera chi ponet a pensare supra sos tempos polìticos, sotziales e culturales chi semus rugrende, ue respirat una Sardigna metafòrica, assighizonada, reduia a pantàsima, a unu logu sena logu, dae is sardos  matessi, chi paret apant pèrdidu sa braga de apartenèntzia, su sentidu de sa dignidade insoro.

Sa narrativa in sardu oe at comintzadu a tratare èsseres de àteros mundos, a faeddare de gherras interspatziales e bolos interplanetàrios. E Pepe Corongiu nos dat  a connòschere custos mundos e sos abitadores insoro, alienos diversos de postura dae sos umanos ma sìmiles in su malu pensare e in su malu fàghere. Metropolitània est un’òpera de importu mannu pro sa literadura in limba sarda.

Unu grabbu deghile de narrare chi ti leat a manu tenta e ti faghet intrare in deretu a s’ànima de su contu che cando nde sias parte. In custos contados, diferentes de trama s’unu dae s’àteru, bi est semper sa Sardigna, suta metàfora, protagonista in cadaunu de issos, cun is valores suos mai pretziados e is dolores mai sanados de colònia isfrutada, ispogiada de sa dignidade.

Sàbiu e galanu su garbu de ligare a pare is fatos de totu is contos, sena perunu iscassiadòrgiu dae s’àndala portante de su filu narrativu. S’impreu pretzisu de sa paràula in s’intessidura de sa trama. Su lugore de su messàgiu sotziale ue s’isprigat su probrema de sa limba, de sa dignidade e s’identidade de s’ìsula sarda: ùnica, balente metàfora intro sa cale benint a cabu is filos de sa tessidura de ònnia contu.

In sa visuale futurìstica de s’autore, sa terra est morinde, afogada dae s’àliga, abbelenada dae su bascaramen radioativu, dae ue sos umanos, animados dae sos mèdios tecnològicos,  punnant a si fuire, in chirca de àteros mundos vivìbiles, cun s’ispera de sarbare sa genia, che i  sos alienos immaginados dae Pepe Corongiu, contras a sos cales sos umanos depent però gherrare pro subravvìvere.

Ma in custu libru, a banda de  sa fantascièntzia, respirant àteros fatos de sa vida reale ligados a: su giornalìsmu, sa crònaca, s’erotismu, sos balores de su tempus coladu, sas isperas pro su benidore, isprigados totus cun dilighia literària balente, bene intèssidos cun una limba profunda, antiga e moderna in unu tempus, rica de ritmu, mùsica e sustàntzia lessicale.

Bidimus carchi sinnu de is contos de is tempos de oe. In S’amore de Pàulu e Isabella, su cortegiamentu de sos duos giòvanos s’autore lu pintat a colores naturales, intro màgines dìligas chi dant a su fruidore unu sensu lèpiu de gosu e de apartenèntzia. O in su contu Ramona, prostituta de cumbènia pro clintes dinarosos, pro gosare de unu tenore de vida artu e lussùriosu.

Una sigunda vida sa sua chi at mantesu cuada a su mundu e a sa familia sua matessi, mascarande.la cun pannos faddinos de onestade. Unu contu galanu, intritziu de paritzos filos chi petzi a sa fine si ligant a pare batinde a cabu sa resone. Un’istòria de sesso chi s’autore contat craru e nudu ma cun una galania narrativa chi non suprit isfadu a sa sensibilidade de chie leghet.

Pepe Corongiu faeddat de sesso in manera crara e naturale chi paret contende fatos de foghile, màgines de su connotu semper vivas in s’immaginàriu colletivu de is sardos. Su maridu de Laura est nu contu apertu a su fitianu, chi narrat in craru sa  libertade de su viver de oje. Unu contare garbosu, rugradu dae un’ironia lèbia chi ti si ridet in laras a manu a manu chi intras in sa sustàntzia de su contadu.

Una manera fine de pintare su sesso in màgines friscas e naturales, ue sos pessonàgios aparint che in carre biba: “Fatu istat chi Làura fiat galu ispogiada in su passadissu e si bidiat bene dae sa ghenna, e deo chi fia basende.la. Ite dannu. Chie podiat immaginare chi su maridu fiat in cue”.

O puru Bentu Lìberu e Columba Galana. Unu contu de grista tzitadina. De cussos chi naschint vivent e morint in sas pratzas de tzitade. Ue sa gente tràvicat forroghende is solianos  fritos de internet chirchende persones dispostas a una relata mustrenga de amore o  de sesso ebbia.

O su contu: Dirigente trasseri. ue is intrallatzos polìticos sunt bene istèrridos e mègius isprigados, cun paragones e assimìgios bene adatados a s’argumentu tratadu.  Sunt paritzos sos fatos durches e rànchidos chi bi sunt cuados in sas pàginas de custu libru. Lughes e umbras de su tempus coladu, de su tempus de oe e de su beniente, bene intèssidas dae sa fantasia e dae sa bena narrativa  frisca e prolìfica de s’autore.

Metropolitània, est unu traballu abberu de gabbale, irònicu e provocatòriu chi mustrat su coràgiu de s’iscritore de nche boler essire dae is pinnigas incanidas de s’ambiente antropològicu, pro si ponner in viàgiu ogros a una meta narrativa e literària prus moderna, foras dae sa galàssia de is contos de foghile.

Intèssidu, cun maestria narrativa, in una limba crara, fàtzile de lèghere e de cumprèndere, peri dae chie cun su sardu at pagu ballassa.

Una borta de prus, Pepe Coròngiu nos narat chi sa Limba Sarda Normale podet narrer e discùtere cun su mundu cale si siat argumentu antigu modernu tecnològicu o iscientìficu. Unu traballu chi ponet punnas a meledare a fundu supra sa salude de sa Sardigna, sa cunditzione nostra de Sardos.